نتنقل من سبيطار لسبيطار باش ناخو رونديفو للمريض متاعي بمواصلاتي الخاصة في 35 درجة حرارة (سويقاتي ربي يفضلهم) نتعرض للهرسلة من قبل ديناصور مدسيني (ابهرني تقول نطلب في متاع ربي 😑). نرجع للسرفيس بنفس المواصلات (سويقاتي الطايبين مالوقفة بعد ما عديت ساعتين واقفة) وتضربني الشمس لين مخي ولا رايب 🤢😨 اما لا علينا الطبيب مخلوق فضائي الحاجات هذم ما يحركولوش شعرة 😑.
نلقى شطر الخدمة تستنى نكملها و لاني انا garde عنا في السرفيس حاجة اسمها échange du sang و هذه عملية شاقة تستحق باااارشا قوة جسدية يستحقوها مرضى فقر الدم المنجلي ، في العادة فما machine تعملو اما خاطر احنا من بلدان العالم سبعطاش الوزارة ما تحبش توفر kit اللي تخدم بيه الماكينة خاطر “مفماش فلوس” (الفلوس ماشية في الحملات الانتخابية و القعدات الوزارية و تقشقيش الحناك) وعلى خاطر احنا كمتربصين في الطب نتحيلو ونخدمو بالموجود ونقرروا نعملوه يدويا والعملية تشد من ساعتين لثلاث ساعات او اكثر وتتسبب في ارهاق جسدي كبير (اخر مرة عملتو دخت مالتعب 😨) وبالطبيعة الناس الكل في السرفيس ما تحبش تعملو واكيييد البهيم القصير هو المعني بالامر اللي هو الطبيب الداخلي… باهي نكمل نمسكل اكتافي ويديا (اصلا هاذي بونيس من الوزارة امنا الحنون تعرف ما عندكش وقت تعمل سبور دونك تجيبلك السبور للخدمة 😌).
نمشي نكمل خدمة السرفيس بين نتشحت فلان يعملك bilan و اجري على بلاصة للمريض، اكذب 200 كذبة باش تنجم دبر راسك مع “المسامر” متاع السبيطارات…
تقعد بعد 14 ساعة خدمة متواصلة باش تاكل اللي كتب وتكمل ال16 ساعة اللي بقاو وتلقى ماكلة كيفما هذه وما نحكيلكمش على المطعم، ممكن كان نشد وزغة ملي يحوسو في الصبيطار و نشويها تطلع ابن🤢🤢، و على خاطر احنا المتربصين في الطب قويين و فضائيين ما نستحقوش ناكلو اصلا اصلا نعيشو بالطاقة المتجددة 🤐🤨
يعني شهرية تشكي لربي و يقصولي منها باش يجبولي بطاطا مصموطة و طماطم قارصة 😤😤
يوميات انتارن تاعب ، العصب يهز فيه و ينفض و زيد بايت جيعان ، و يحبوك تخدم تضحك و شايخ و تفرق البسمات!

صورة المقال: عشاء حصة الاستمرار، مباشرة من على عين المكان

Interne en médecine